Индонезийн парламент өнгөрсөн долоо хоногт гэрлээгүй хосуудын хамтын амьдралыг хориглож, гэрлэлтээс гадуур бэлгийн харилцаанд орвол эрүүгийн хариуцлага хүлээлгэх хууль баталсан. Тэгвэл аялал жуулчлал өндөр хөгжсөн Бали арлын амбан захирагч Индонезид гэрлэлтээс гадуур бэлгийн харьцааг хориглосон нь жуулчдад эрсдэл учруулахгүй гэж мэдэгджээ. Амбан захирагч Уэйан Костер шинэ хуулиар эцэг эх, эхнэр, нөхөр, хүүхдүүд нь гомдол гаргасан тохиолдолд л эрүүгийн хэрэг үүсгэн шалгах учир жуулчид тус улсын эрүүгийн хуулийн өөрчлөлтөд санаа зовох хэрэггүй гэв.
Тус улсын засгийн газар зочид буудал, вилла, орон сууц, зочны байшин, зуслангийн газар, рашаан сувилал зэрэг аялал жуулчлалын аль ч байранд бүртгүүлэхэд гэр бүлийн байдлыг шалгахгүй гэдгээ мөн мэдэгдлээ.
Индонезийн аялал жуулчлалын салбарын зөвлөлийн дэд дарга Маулана Юсран энэ хууль цар тахлын дараа эдийн засаг, аялал жуулчлал дөнгөж сэргэж эхэлж буй энэ үед жуулчдыг нэмэх төрийн бодлогын эсрэг ажиллаж байна гэж үзэж буйгаа илэрхийлсэн юм.
