Нийлэлийн онцгой байдлын газраас мэдээлснээр энэ онд гал түймэр, аврах ажиллагааны нийт дуудлага өмнөх оны мөн үетэй харьцуулахад 21.8 хувиар өсчээ.
Он гарснаас хойш аюулт үзэгдэл, ослоос 2377 иргэний амь аварч, 78.5 тэрбум төгрөгийг авран хамгаалсан байна. Нийт дуудлагыг өмнөх гурван жилийн дундажтай харьцуулахад, 14.4 хувиар буурсан үзүүлэлттэй гарчээ.
Он гарснаас хойш үерийн 120 гаруй дуудлагад ажиллаж, 150 иргэнийг аварсан байна. Сүүлийн 12 жил гол усны ослоос урьдчилан сэргийлэх чиглэлээр завьт эргүүлийн арга хэмжээг зохион байгуулж байгаа бөгөөд энэ жилийн хувьд усны ослын 42 дуудлага бүртгэгдэж, 80 иргэнийг аварчээ. Мөн нөлөөллийн ажил хийсний үр дүнд усанд осолдсон иргэдийн тоо 3.5, дуудлага 17.7 хувиар буурсан байна. Өнгөрсөн хавар хуурайшилт их байсан ч холбогдох мэргэжлийн байгууллагатай хамтарч, ногоон бүсэд эргүүл зохион байгуулснаар томоохон ой, хээрийн түймэр гараагүй байна.
