УСУГ-аас 2008 оноос эхлэн судалж 2018 оноос ажил хэрэг болгосон цэвэр усны шугам сүлжээг засварлах, шинэчлэх ажилд шуудуу ухалгүйгээр шугам хоолой доторлох дэвшилтэт технологийг хүмүүс сайн мэддэг болсон. Энэ технологиор одоогоор 15км шугамыг доторлоод буй бөгөөд энэ шугамууд ирэх 100 жилд толгой өвтгөхгүй хэвийн байдлаар ажиллах боломжтой юм.
Шугамыг сүвэгчлэн доторлохдоо шугамын дотор диаметрээс хамааран робот машин оруулж дотор ханын өнгөрийг хусч, зүлгэгч машинаар зүлгэн доторлоход бэлтгэдэг байна. Үүний дараа хэмжсэн уртын дагуу доторлогооны материалаа оруулан халуун хийгээр үлээлгэн шугамын дотор хананд шинэ хана үүсгэдэг ба эцэст нь хянагч камер оруулан шалгадаг ажээ.
