УИХ-ын 18, 28-р тойргийн нөхөн сонгуулийн хоёр удаагийн санал хураалтаар сонгогчдын ирц хуульд заасан доод хэмжээ буюу сонгогчийн 50 хувьд хүрээгүй байхад Ц.Идэрбат, Н.Батшугар нарыг УИХ-ын гишүүнээр сонгогдсонд тооцож, гишүүний үнэмлэх олгосон. СЕХ-ны энэ шийдвэрийг албажуулж, хоёр нэр дэвшигчийг тангараг өргүүлсэн УИХ Цэцэд дуудагдаж магадгүй боллоо.
Сонгогчдын олонхын саналыг аваагүй нэр дэвшигчдийг УИХ-ын гишүүнээр сонгогдсонд тооцсон нь Үндсэн хууль болон бусад хуулийг ноцтой зөрчсөн гэж үзэн УИХ-ын гишүүн, Хууль зүйн сайд асан Х.Тэмүүжин тэргүүтэй хуульчид Цэцэд хандахаар болжээ. Тэд төрийн эрх барих дээд байгууллагад олонхиор сонгогддог байх хуулийн зарчмыг УИХ зөрчсөн гэж үзэж байгаа ажээ.
