Дэлхийг дуу хөгжмөөрөө байлдан дагуулсан Backstreet Boys хамтлаг 1993 онд АНУ-ын Флорида мужийн Орландо хотоос төрөн гарсан байдаг. Тус хамтлаг дэлхий даяр 130 сая хувь цомог борлуулсан нь бүх цаг үеийн дээд амжилтуудын нэгд тооцогддог. Анхны цомгууд нь бүгд Billboard жагсаалтын эхний 10-т багтаж байжээ.
Тус хамтлагийнхан Монголд ирж тоглолтоо хийж магадгүй гэсэн таатай мэдээлэл байна. Монголоос хэсэг залуу тус хамтлагийнхантай холбоо тогтоож, Монголд урьж авчрахаар АНУ-д очоод байгаа юм байна. Хэзээ ирэх, хаана тоглох, хэр удаан хугацаанд зочлох зэрэг нь мэдээж хэрэг нарийн гэрээ хэлэлцээрээр шийдэгдэх ажээ.
Тус хамтлагийнхан өдгөө Лас Вегас хот орчмоор төвлөрөн амьдарч байгаа юм байна. Монголоос зорьж очсон залуус тус хамтлагийнхантай яриа хэлэлцээ хийхээр бэлтгэж байгаа бөгөөд амжилттай болбол олон нийт болон Монгол дахь фэнүүдэд нь албан ёсоор мэдээлнэ гэдгээ хэллээ. 
