АРДЧИЛСАН НАМЫН БҮЛГИЙН ДАРГА Ч.МӨНХБАТ: . Архангай аймгийн ИТХ Засаг даргаа огцруулсан тухай мэдээлэл гарсан. Энэ талаар тус аймгийн ИТХ дахь АН-ын бүлгийн дарга Ч.Мөнхбат “Энэ хурал нь Нэгжийн хууль зөрчиж, хууль бусаар хуралдсан тул аймгийн Засаг даргыг огцруулах шийдвэр нь хүчин төгөлдөр биш. Архангай аймгийн Иргэдийн Төлөөлөгчдийн Хурлын нэр бүхий төлөөлөгчдөөс 2021 оны 05 дугаар сарын 21-ний өдөр ирүүлсэн аймгийн Засаг даргыг огцруулах тухай асуудлыг аймгийн Иргэдийн Төлөөлөгчдийн Хурал дахь Ардчилсан намын бүлэг хэлэлцээд дараахь шийдвэрийг гаргаж байна. Аймгийн иргэдийн Төлөөлөгчдийн Хурлын нэр бүхий 14 төлөөлөгчийн гарын үсэг бүхий 2021 оны 05 дугаар сарын 21-ний өдрийн аймгийн Засаг даргыг огцруулах тухай албан бичигт дурдагдсан үндэслэлүүд нь хууль зөрчсөн эсэх нь тогтоогдоогүй. Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн 32 дугаар зүйлийн 32.6 дахь заалт “Хурлын төлөөлөгчдийн гуравны нэгээс доошгүй нь Засаг даргыг огцруулах саналд гарын үсэг зурж Хурлын даргад өргөн мэдүүлснээс хойш Хурал 15 хоногийн дотор уг саналыг хуралдаанаараа хэлэлцэж олонхийн саналаар шийдвэрлэнэ гэж заасан. Хуулийн энэ заалтыг зөрчиж хуулийн хугацаанд хуралдуулаагүй гэж Ардчилсан намын бүлэг үзэж, 2021 оны 07 дугаар сарын 20-ны өдөр зарлагдсан аймгийн Иргэдийн Төлөөлөгчдийн хурлын ээлжит бус хуралдаанд оролцохгүй байхаар шийдвэрлэсэн. Энэ хурал нь хууль бусаар хуралдсан тул аймгийн Засаг даргыг огцруулах тухай гаргасан шийдвэр нь хүчин төгөлдөр бус. Хууль бус учраас бид тус хуралд оролцоогүй” гэв. Мөн тэрбээр, дэлхий нийтээр цар тахлын халдвартай тэмцэж буй хүнд цаг үеийг далимдуулан улстөржиж байгаад харамсалтай байна гэсэн юм.
Ч.Мөнхбат: Архангайн Засаг даргыг огцруулсан шийдвэр хууль бус
