Ерөнхийлөгч Х.Баттулгын ойрын хүмүүс ар араасаа элдэв дуулианыг дэгдээж байна. Хонгилын шүүгч, прокуроруудын хэрэгт холбогдсон өмгөөлөгч Б.Баасанцогтын лифтэн дэх бичлэг, олимпийн аварга Н.Түвшинбаярын зодооны дуулиан олны анхаарлыг татаж хуулийн өмнө очсон. Тэгвэл энэ буухиаг Ерөнхийлөгчийн Тамгын газрын дарга Ө.Шижир үргэлжлүүллээ.
Тэрээр архи уусан үедээ айлын гэрийн хаалгыг эвдэж, агсан тавьж танхайрч, улмаар цагдаад саатуулагджээ. Гэсэн ч түүнийг төд удалгүй суллан явуулсан талаарх мэдээллүүд цахим орчинд дэлгэгдсээр байна.
Үүнд Ө.Шижир тайлбар хийхдээ… “Үл ойлголцол үүссэн нь үнэн. Бас согтуу байгаагүй. Элдэв асуудал үүсгээгүй. Цагдаагийн шаардлагыг 100 хувь биелүүлсэн” гэжээ.
Эргэн сануулахад… Ө.Шижир нь “Хөл бөмбөгийн холбоо”-ны ерөнхий нарийн бичгийн дарга, АН-ын үндэсний бодлогын хорооны гишүүн байсан. Мөн Ерөнхийлөгч Х.Баттулгыг Зам тээвэр, барилга хот байгуулалтын сайдаар ажиллаж байхад нь сайдын багт ажиллаж байгаад түүнээс хойш Ерөнхийлөгч Х.Баттулгын хэвлэлийн кампанит ажлыг удирдаж байсан гэх мэдээлэл бий.
Түүнчлэн Ө.Шижир нь МХБХ-ны Ерөнхий нарийн бичгийн даргаар ажиллаж байхдаа тус холбооны багш дасгалжуулагчид тамирчдад зүй бус авир бэлгийн дарамт, хүчирхийллийн гэмт хэргийг нуун дарагдуулж, гэм буруутай этгээдүүдийг албан тушаал дэвшүүлж, шагнаж байсан баримтыг хэвлэлүүд дэлгэж байсан удаатай. Үүнээс харахад ЕТГ-ын дарга Ө.Шижир дахин дуулиан дэгдээхгүйн тулд дээрх асуудлыг чимээгүйхэн өнгөрөөхийг хичээж байгаа нь илт байна.
Ө.Шижир нь спорт тайлбарладаг хөтлөгчөөр ажиллаж байгаад гэнэтхэн Монгол Улсын Ерөнхийлөгчийн Тамгын газрын даргын хариуцлагатай албан тушаалд томилогдсон. Түүнийг томилогдох үеэр Монгол Улсын бодлого тодорхойлох гол алба ажил дээр ажлын туршлага, боловсрол мэдлэг нь тэнцэхгүй, хүрэхгүй хүн тавилаа гэж байв.
Ийнхүү Ерөнхийлөгч Х.Баттулгыг тойрон хүрээлэгчид хууль бус үйлдэл, авлигал хээл хахуул, архи дарснаас үүдэлтэйгээр булай булхайгаа дэлгэсээр байна…
Э.ТУЯА
