Монголын Сэтгүүлчдийн нэгдсэн эвлэлтэй хамтран үндэсний мэдээллийн МОНЦАМЭ агентлагаас олгодог “Мэдээний шилдэг сурвалжлагч” шагналыг “Монголын үнэн” сонины сэтгүүлч Б.Сэлэнгэд олголоо.
Б.Сэлэнгэ нь 2011 оноос хойш мэргэжлээрээ ажиллаж байгаа залуу шилдэг сэтгүүлчдийн төлөөлөл бөгөөд өдөр тутмын сонины редакцын ажлыг удирдан нийтлэлийн бодлогыг тодорхойлох, шуурхай мэдээллийн албыг бэхжүүлэх чиглэлээр ажиллаж яваа чадварлаг редактор, “Монголын үнэн” сонины Хариуцлагатай нарийн бичгийн дарга юм. Энэ онд “Монголын үнэн” сонины 100 жилийн ой тохиож байгаатай холбогдуулан тус сонины шилдэг ажилтны нэгийг ийнхүү урамшууллаа.
Шагналыг “Алтан дүрмийн эзэн” тэмдэг, мөнгөн шагнал дагалддаг бөгөөд МОНЦАМЭ агентлагаас МСНЭ-тэй хамтран 2016 оноос хойш 5 дахь жилдээ олгож байна. Монголын үндэсний сэтгүүл зүй үүссэн өдөр буюу жил бүрийн гуравдугаар сарын 6-нд олгодог уг шагналыг 2020 онд улс орон даяар үүссэн коронавирусний нөхцөл байдалтай холбоотойгоор хойшлуулаад байсан юм.
