Эрчим хүчний хэрэглээний өслтийн талаар Эрчим хүчний зохицуулах хорооны дарга А.Тлейхан мэдээлэл өгч, сэтгүүлчдийн асуултад дараах хариултуудыг өглөө.
-Шийдвэр гарснаас хойш ачаалал хэр зэрэг өсөж байгааг хэлнэ үү?
-Шийдвэр гарснаас хойш ачаалал гэнэт өсөж 18 хувиар нэмэгдсэн. Цаашид ч хэрэглээ өснө гэж бид үзэж байгаа. Хэрэв эрс өсөөд байвал эрчим хүчний салбарт эрсдэл үүсэх аюултай. Эрчим хүчний тоног төхөөрөмжүүд бүгд өөрийн тооцсон хүчин чадалтай тул тэрийгээ давбал сааталд орж, автомат тасалдал үүснэ.
-Өмнөх сарын төлбөрөөс хэрэглээ давсан тохиолдолд зөрүүг нь иргэд төлөх тухай журамд тусгагдахаар яригдаж байгаа гэсэн мэдээлэл байна. Энэ үнэн үү?
-Тийм яриа бий. Гэхдээ аль болох техникийн боломж хүчин чадал нь байвал хангаад явна. Яамнаас хэрэглээг зөв зохицуулах журам гарна. Журам эцэслэгдэж батлагдаагүй байна.
-Хэрэглээ хэтэрсэн газруудад ямар арга хэмжээ авч байгаа вэ?
-Улаанбаатарын бүх шугамаа хэмжүүртэй болгосон. Хэрэглээг нь байнга хянаад хэтэрч байна, тасарч болзошгүй тул хэрэглээгээ хязгаарлаарай гэдгийг хэлж байгаа. Бидний үүрэг тэр. Ганц хоёр трансформатор дээр жижиг гэмтэл гарсан. Энэ нь ачаалал хэтрээд буудсан асуудал биш. Аль болох системээ аврах, бүрэн зогсоохгүй байхаар ажиллана. Бүр болохгүй бол тасална гэсэн тооцооллуудыг хийж байгаа. Гэхдээ бүгд харанхуй болох вий гэж айх хэрэггүй. Иргэд үнэгүй юм гэж бодоод илүү хэрэглээ битгий гаргаарай гэж хүсье.
-Цахилгааны хэрэглээ огцом өссөнөөс болоод зарим аймагт цагийн хязгаарлалт хийсэн гэж байна. Энэ үнэн үү?
-Өчигдөр бага хугацаагаар зарим аймагт цахилгааны хязгаарлалт хийсэн. Хүчин чадал хүрэхгүй, их ачаалалтай байгаад ирвэл хэсэгчилсэн байдлаар түр хугацаанд хязгаарлалт хийхээс өөр аргагүйд хүрнэ. Аль болох ахуйн хэрэглээг бус томоохон үйлдвэрүүдийг ээлжээр ажиллах зохион байгуулалттайгаар тооцсон. Хязгаарлалтад орохгүйн тул илүү хэрэглээ битгий гарга гэдэг нь ийм учиртай.
-Төсөв 650 тэрбум төгрөгөөс давбал Эрдэнэт үйлдвэр төлөх үү?
-650 тэрбум гэдэг нь урьдчилсан тооцоо. Үүнээс илүү гарах тохиолдолд хэрэглээнээс нь хамаараад төр төлж таарах байх.
