Тайбэй дахь Улаанбаатарын Худалдаа, эдийн засгийн Төлөөлөгчийн газар, Тайваний Хааны ордон музейтэй хамтран Монголын байгаль, түүх, соёл, урлаг, монголчуудын өдөр тутмын амьдралын онцлогийг харуулсан “Монголын сар” соёл, урлагийн үзэсгэлэн, арга хэмжээний нээлтийг 2020 оны 9-р сарын 26-нд Тайваний Хааны ордон музейн Зя-и аймгийн Тайбао хот дахь Өмнөд салбарт зохион байгуулав.
Арга хэмжээний үеэр монгол гэр барих үйл явцтай танилцах, монгол гэрт зочлох, үндэсний дээл хувцас өмсөх, монгол тоглоом наадгайгаар тоглох боломжийг бүрдүүлэхийн зэрэгцээ 2020 оны Монголын үндэсний их баяр наадмын нээлтийн дүрс бичлэг, гэрэл зургийг ирсэн зочдод сонирхуулав.
Нээлтийн ёслолд Төлөөлөгчийн газрын тэргүүн Л.Золзаяа, Тайваний Соёлын дэд сайд Су Зунхуан, Хааны ордон музейн захирал Вү Мица тэгүүтэй төлөөлөгчид оролцсон бөгөөд хамтын ажиллагааны талаар санал солилцож, арга хэмжээг цаашид уламжлан болгон зохион байгуулах, үзэсгэлэнг Тайбэй хот дахь Хааны ордон музейд үргэлжлүүлэн гаргахын зэрэгцээ соёл урлагийн салбарт хамтран ажиллах саналыг Тайваний тал дэмжиж буйгаа илэрхийлэв.
Үзэсгэлэн 2020 оны 11-р сарын 1-нийг хүртэл сар гаруйн хугацаанд үргэлжилж, Монголын түүх, уламжлал, соёл, урлагийг сурталчилна.
