Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд С.Баяр, Ц.Баярцогт, Д.Ганболд, Б.Бямбасайхан нарын долоон хүнд холбогдох шүүх хурал /2020.06.18/ 10.00 цагт эхэллээ. Шүүхээс С.Баярцогт, Д.Ганболд, Б.Бямбасайхан нарт авсан таслан сэргийлэх арга хэмжээг өөрчлөн дараагийн шүүх хурал хүртэл цагдан хорих шийдвэр гаргаж, Шүүх хуралдааныг зургадугаар сарын 22-ны 09:00 цаг хүртэл хойшлууллаа.
Тодруулбал, Шүүхээс 06-р сарын 15-ны өдөр болсон гэм буруугийн шүүх хуралдаанаар С.Баярцогт, Д.Ганболд нарт тус бүр 10 тэрбум, С.Баярт таван тэрбум, Б.Бямбасайханд хоёр тэрбум төгрөгийн барьцаа байршуулах таслан сэргийлэх арга хэмжээ авсан байсны дагуу С.Баяр 5тэрбум төгрөгөөс 500 орчим сая төгрөгийн барьцааг өнөөдрийн байдлаар шүүхийн тусгай дансанд байршуулснаар цагдан хорих шийдвэрийг түүнд гаргаагүй байна. Харин Б.Бямбасайханы хувьд 200 орчим сая төгрөгийг байршуулсан боловч цагдан хорих шийдвэрийг гаргажээ.
Б.Бямбасайханы өмгөөлөгчийн хэлж буйгаар Ардчилсан намын 3 гишүүнийг цагдан хорих шийдвэр гаргасан нь өөрөө улс төрийн ямар нэгэн зорилготой байх магадлалтай гэх мэдээллийг өглөө.
Прокуророос Монгол Улсын Ерөнхий сайдаар ажиллаж байсан С.Баяр, Засгийн газрын хэрэг эрхлэх газрын даргаар ажиллаж байсан С.Баярцогт, Эрдэнэс монгол компанийн удирдах албан тушаалд ажиллаж байсан Б.Бямбасайхан, Д.Ганболд нарын долоон хүнд холбогдох эрх мэдэл, албан тушаалын байдлаа урвуулан ашигласан, үндэслэлгүй хөрөнгөжсөн, мөнгө угаасан үйлдэлтэй хэрэгт гуравдугаар сарын 9-ний өдөр яллах дүгнэлт үйлдэж шүүхэд шилжүүлсэн байдаг.
