Эрүүл мэндийн яамны ээлжит мэдээллийн үеэр ХӨСҮТ-ээс дараах мэдээллийг өглөө.
ХӨСҮТ-ийн ерөнхий захирал Д.Нямхүү:
-“2020 оны дөрөвдүгээр сарын 29-нд буюу өчигдөр коронавирусийн халдварын сэжигтэй тохиолдол улсын хэмжээнд бүртгэгдээгүй. ХӨСҮТ, Дархан-Уул аймгийн нийт гурван лабораторид 163 хүний сорьцод шинжилгээ хийхэд коронавирусийн халдвар илрээгүй. Тодруулбал, ХӨСҮТ-д тусгаарлагдсан 12, Дорноговь аймагт тусгаарлагдсан 31, Замын-Үүдэд тусгаарлагдсан 1, тандалтын 46 хүний шинжилгээнд коронавирусийн халдвар илрээгүй.
Дархан-Уул аймгийн салбар лабораторид хийгдсэн Алтанбулагийн боомтоор орж ирсэн ачаа тээврийн 31 жолооч, ажиглалтад байсан 43 хүний давтан шинжилгээнд коронавирусийн халдвар илрээгүй.
ХӨСҮТ-д одоогоор 73 хүн байна. Бусдыг нь дараагийн шат руу шилжүүлж, 150 орыг бэлдлээ. Одоо чартераар ирэх иргэдэд онцгой анхаарал хандуулна. Эмчлүүлж буй өвчтөнүүдийн хувьд хэдэн өдөр дамжих халуурсан, гүйлгэж байгаа өвчтөнүүд байгаа тул эмчилгээндээ онцгой анхаарч байна .
ОХУ-аас ирсэн оюутнууд 20-иод хоночихлоо. Заримд нь 3, заримд нь 4 удаа давтан шинжилгээ хийхэд коронавирусийн халдвар илрээгүй” гэв.
