Энэтхэг улс 21 хоногийн хорио цээрийн дэглэмд шилжиж байгаагаа Ерөнхий сайд Нарендра Мод өчигдөр орой мэдэгдлээ. 21 хоногийн хугацаанд иргэд гэрээс гарахгүй бөгөөд гарсан тохиолдолд шийтгэл оногдуулах юм байна. Энэ нь одоогоор коронавирусний халдварын үед улс орнуудын авч хэрэгжүүлж буй хамгийн хатуу гэж хэлж болох арга хэмжээ болоод байна. Учир нь өнөө өглөөнөөс эхэлсэн хорио цээрийн дэглэмийн талаарх энэхүү мэдэгдлээ мягмар гарагийн орой иргэддээ мэдэгдсэн бөгөөд өмнө нь ямар нэгэн байдлаар хүнс хоолоо нөөцлөхийг сануулалгүйгээр ийн шийдсэн нь иргэдийг нэлээд хэцүүхэн байдалд оруулаад байгаа ажээ.
Үүнээ үүдэж хоол хүргэлтийн ажилчид болон иргэд, цагдаа нарын дунд асуудал үүсэх болжээ. Цагдаа нар иргэдийг гэрээс гарахгүй байхыг, хоол хүргэлтийн ажилчдыг буцахыг шаардаж байгаа бөгөөд гудамжинд цагдаа нарт зодуулах зэрэг үйлдлүүд гарч байгаа юм байна. Коронавирусаар өвчлөхөөр өмнө өлсгөлөнгөөр үхэж магадгүй нь гэж энэтхэгүүд ихээхэн бухимдаж байгаа юм байна.
Коронавирусний дэгдэлтийн оргил үе болсон энэ цаг үед 21 хоногийн хорионд шилжих нь энэтхэг хүн бүрийн эрүүл мэдийн төлөө хийж байгаа алхам гэж тус улсын засгийн газар үзжээ. Ерөнхий сайдын хэлснээр Энэтхэг улс коронавирусний халдварын эсрэг 2 тэрбум доллар зарцуулахаар тооцоолсон байна.
Тус улсад одоогоор коронавирусний 519 тохиолдол бүртгэгдэж, 10 хүн нас бараад байгаа юм.
