Холимог тулааны дэлхийн хамгийн том холбоо болох АНУ-ын UFC-гийн анхны монгол тамирчин болсон Д.Батгэрэл өнгөрсөн ням гарагт АНУ-ын Лас-Вегас хотод Аргентиний тулаанч Гуйдо Ганнеттитэй учраа таарч, өрсөлдөгчөө хүнд цохилтоор буулган авлаа. Түүний энэ ялалт монгол хүн холимог тулааны спортоор дэлхийн аварга болох боломжтой гэдэг итгэл найдварыг улам бадрааж өгсөн юм.
Данаагийн Батгэрэл Дэлхийн шилдгүүд хүч сорьдог UFC холбоотой гэрээ байгуулж, Монголоос хөл тавьсан анхны төдийгүй цорын ганц тулаанч юм. UFC холбоо, “Team Tungaa” “One team” клубийн тамирчин тэрбээр мэргэжлийн дэвжээнд найм тулалдахдаа зургаад нь ялаад байгаа юм. “One championship” холбооны дэлхийн аварга асан, гавьяат тамирчин Ж.Нарантунгалагийн шавь бөгөөд өнгөрсөн оны наймдугаар сард UFC холбоотой 20 сарын гэрээ байгуулсан юм.
