Хятадын Ухань хотод өнгөрсөн сард анх илэрсэн коронавирус хамгийн сүүлийн мэдээллээр Азийн гурван улсад нэмж илрээд байна. Одоогоор БНХАУ-д 300 хүн халдвар авч 6 хүн нас бараад байгаа бол, Тайвань, Япон, Солонгост анхны тохиолдлууд бүртгэгдээд байна. Үүнтэй холбогдуулан Дэлхийн Эрүүл Мэндийн Байгууллага (ДЭМБ) маргааш яаралтай хуралдаж олон улсын хэмжээнд эрүүл мэндийн онц байдал зарлах үгүйг хэлэлцэж, шийдэхээр болжээ.
Үүнээс гадна уг вирусыг хүнээс хүнд халдах магадлал бага гэж ДЭМБ мэдэгдэж байсан ч шинэ вирус нь хүнээс хүнд халддаг болохыг Хятадын тал батлаад байна.
БНХАУ-д удахгүй сар шинийн баяртай холбоотойгоор иргэдийн хөдөлгөөн ихэсч, энэ нь эргээд тархалтыг нэмэгдүүлэх магадлалтай байгаа юм.
Япон, Тайвань, Солонгост бүртгэгдсэн тохиолдлууд бүгд БНХАУ-ын Ухань хотод зорчоод ирсний дараа халдварын шинж тэмдэг нь илэрсэн байна.Жишээлбэл, 55 настай тайвань эмэгтэй Ухань хотод ажилладаг байсан бөгөөд нутагтаа ирсний дараа халдвар авсан нь мэдэгдсэн аж. Харин БНСУ-д илэрсэн тохиолдлын хувьд өвчтөн Ухань хотод амьдардаг хятад иргэн байсан юм байна.
