Нийслэлийн 2020 оны төсөвт Улаанбаатар хотод автозам ашигласны төлбөрийг 5 дахин нэмэгдүүлэхээр ИТХ-аас баталсан. Үүнд олон нийт шүүмжлэлтэй хандаж, зарим улс төрийн нам, иргэний нийгмийн байгууллагууд эсэргүүцлийн машинтай жагсаал хийж эхлээд байгаа. Ерөнхий сайд У.Хүрэлсүх энэ долоо хоногт нийслэлийн Засаг дарга бөгөөд Улаанбаатар хотын захирагч С.Амарсайханыг дуудаж уулзан зам ашигласны төлбөрийг огцом нэмэх шийдвэрээ эргэн харахыг чиглэл болгосон юм.
Нийслэлийн ИТХ-ын шийдвэрийг эсэргүүцэн жагсаж байгаа хүмүүсийн төлөөлөлтэй Хотын дарга С.Амарсайхан уулзав. Жагсагчид автозам ашигласны төлбөрийг 5 дахин нэмсэн шийдвэрээ нэн даруй цуцлах, төсвийн орлого бүрдүүлэх чиглэлээр хэмнэлтийн бодлого баримтлах гэсэн хэд хэдэн шаардлага тавьж байгаагаа хэлсэн юм. Нийслэлийн Засаг дарга бөгөөд Улаанбаатар хотын захирагч С.Амарсайхан дээд албан тушаалтнаас өгсөн чиглэлийг харгалзан үзэж, нийслэлийн ИТХ-д 2020 оны төсөвт өөрчлөлт оруулах саналаа баасан гарагт өргөн барина гэдгээ хэлэв.
Нийслэлийн 2020 оны төсөвт өөрчлөлт оруулахдаа орлого хаанаас олох, зам ашигласны төлбөрийг 5 дахин нэмсэн шийдвэрээ бүрмөсөн цуцлах эсэхээ судалж байгаа учраас өнөөдөр албан ёсны хариу хэлэх боломжгүй байна. Засаг даргаас оруулсан саналыг нийслэлийэн ИТХ батлах учраас ямар шийдвэр гарахыг урьдчилан хэлэх боломжгүй гэсэн тайлбарыг С.Амарсайхан дарга өгсөн нь жагсагчдад таалагдсангүй.
Хэрэв зам ашигласны төлбөрийг огцом нэмсэн шийдвэрээ цуцална гэсэн баталгаатай амлалт өгөхгүй бол жагсаал цуглааныг өргөжүүлж, хотын удирдлагуудыг огцруулах улс төрийн тэмцэл болгоно гэж МАХН, Үнэн ба зөв нам зэрэг байгууллагын төлөөлөл хэлж байлаа. Үүний хариуд нийслэлийн Засаг дарга бөгөөд Улаанбаатар хотын захирагч С.Амарсайхан би та нарын улс төрийн дарамт шахалтаас айхгүй гэснээр уулзалт өндөрлөв. Юутай ч Ерөнхий сайдаас чиглэл болгосны дагуу нийслэлийн 2020 оны төсөвт өөрчлөлт оруулах саналаа баасан гарагт ИТХ-д өргөн барих ажээ.
Ядаж 2-3 дахин нэмэх хэрэгтэй дээд