Монгол Улс БНХАУ-ын Шанхай хотод Ерөнхий консулын газраа өнгөрсөн долоо хоногт нээлээ. Шанхай бол 25 сая хүн амтай, өмнөд хөршийн тэргүүлэх хотуудын нэг юм. Тус хотод Ерөнхий консулын газраа нээснээр Монгол Улс дэлхийн хотуудад 72 дахь салбартай болсон байна.
Шанхай дахь Ерөнхий консулын газар Шанхай хот болон Шянши, Фужянь, Жөжян, Аньхуй, Жянсу мужийг хариуцан ажиллах бөгөөд тус бүс нутагт ажиллаж, суралцаж байгаа монгол иргэдийн эрх ашгийг хамгаалах, консулын үйлчилгээг түргэн шуурхай хүргэх, манай улсад жуулчлах, хөрөнгө оруулах зорилгоор зорчих хятад болон бусад улсын иргэдэд визийн үйлчилгээ үзүүлнэ.
Үүнээс гадна Монгол Улсын хөрөнгө оруулалтын орчин, экспортын боломжийг Хятадын хөрөнгө оруулагчид, хэрэглэгчдэд сурталчлан таниулах, тус улсын дэвшилтэт техник технологийг Монголд нэвтрүүлэх боломжийг эрэлхийлэх зэргээр хоёр улсын худалдаа, эдийн засгийн харилцааг гүнзгийрүүлэх, бизнес эрхлэгчдийн хэлхээ холбоог бэхжүүлэх чиглэлээр үйл ажиллагаа явуулах ажээ.
