Австралийн сонинууд өнөөдрийн дугаарын нэгдүгээр нүүрээ хараар дарсан ийм бичгээр дүүргэжээ. Тэд Үндэсний аюулгүй байдлын хууль нь үндэсний нууц байдал нэрийн дор сэтгүүлчдийн нийтлэх эрхэнд халдаж байна гэж үзэж эсэргүүцлээ ийн илэрхийлсэн байна. Австралийн Засгийн газар энэ хууль хэвлэлийн эрх чөлөөнд халдаагүй, тэгээд ч хуулиас дээгүүр ямар ч зүйл байж болохгүй гэсэн мэдэгдэл хийсэн юм.
Тус улсын “Мэдэх эрхтэй” холбоонд одоогоор сонинуудаас гадна хэд хэдэн телевиз, радио, сайтууд нэгдээд байгаа ажээ. “Биднээс юуг нуухыг хичээгээд байна?” гэсэн асуултыг Засгийн газраас асуухыг хэвлэлийнхэн олон нийтэд санал болгоод байна.
Өнгөрсөн зургадугаар сард Австралийн “Өргөн нэвтрүүлгийн корпорац” болон “Мэдээллийн корпорац”-д цагдаагийнхан нэвтэрч нэгжлэг хийсэн нь маш их шуугиан тарьсан билээ.
