Хонь оготно идээд байна гэх малчдын яриа, мэдээлэл сүүлийн үед их гарах болсон. Хачирхалтай энэ мэдээлэл яах аргагүй үнэн бөгөөд ялангуяа баруун болон баруун урд бүсийн сумдад энэ явдал их гарах болжээ.
Тэгвэл хонь, мал эрдэс тэжээл буюу уургийн дутагдалд орсоны улмаас оготно барьж идэж байгаа ажээ. Ийм асуудалтай тулгарсан аймгуудын Мал эмнэлгийн газраас Мал эмнэлгийн ерөнхий газарт оготно идээд байгаа малд тусгай судалгаа, шинжилгээ хийх баг ажиллуулж өгөөч гэх хүсэлтийг явуулаад байгаа юм байна. Тэгэхээр одоогоор оготно идсэн малын биед ямар өөрчлөлт орсон, хүнсэнд хэрэглэж болох эсэх нь тодорхойгүй байгаа бөгөөд судалгааны дараа тодорхой болох юм. Хулгана идсэн мал хордлогод орж ихэвчлэн үхдэг бөгөөд хорлогын шинж тэмдэг илэрвэл даруйхан туулгалт хийх, малдаа эрдсээр баяжуулсан тэжээлийг хашаа хороондоо тавьж өгөх урьдчилсан зөвлөмжийг Мал эмнэлгийн газраас малчдад өгчээ.
