Дэлхийн бөхийн нэгдсэн холбоо (UWW)-ноос өнгөрсөн сард болсон тив тивүүдийн аварга шалгаруулах тэмцээний дараа дэлхийн чансааны оноог шинэчлэн гаргасан. Эрэгтэйчүүдийн 97 кг-д БНХАУ-ын Шиань хотод болсон Азийн АШТ-д мөнгөн медаль хүртсэн ОУХМ Өлзийсайханы Батзул 44 оноогоор жиндээ гуравдугаар байрт бичигдэв. Энэ жинд “Рио-2016” олимпийн наадам болон дэлхийн гурван удаагийн аварга “Орос танк” Абдулрашид Садулаев 80 оноогоор тэргүүлж, түүний гол өрсөлдөгч “Рио-2016” олимпийн наадам болон дэлхийн хошой аварга АНУ-ын Кайл Снайдер 78 оноогоор аман хүзүүдэж буй.
Энэ сарын 24-25-нд болох Сассаригийн ОУТ, ирэх долдугаар сарын 12-14-нд болох Яшар Догугийн нэрэмжит ОУ-ын тэмцээнд дэлхийн чансааны оноо олгох юм. Дээрх хоёр тэмцээний дараа дэлхийн чансааны оноог нэгтгэж ирэх есдүгээр сард Казахстаны Нур-Султан хотод болох ДАШТ-д жин тус бүрт эхний дөрвөн байр эзэлсэн тамирчин хэсгээ толгойлно.
Ө.Батзул дэлхийн чансааны гуравт бичигдэв
