Солонгосын агаарын тээврийн хоёрдогч компани ирэх 3-р сарын сүүлчээс эхлэн Сөүл-Улаанбаатарын чиглэлд нислэг үйлдэхээр болж, энэ сарын сүүлчээр сонгон шалгаруулалтаа хийх болсон тухай бид өмнө нь мэдээлж байсан. Тэгвэл БНСУ-ын Газар, дэд бүтэц, тээврийн яамнаас Сөүл-Улаанбаатарын чиглэлд нислэг үйлдэхээр “Asiana Airlines” шалгарсныг өнөөдөр албан ёсоор зарлалаа. “Asiana Airlines” компанитай цуг өрсөлдөж байсан Jeju Air, Eastar Jet компаниудад Сингапур руу нислэг үйлдэх агаарын тээврийн эрх олгожээ.
“Asiana Airlines” нь БНСУ-ын агаарын тээврийн хоёрдогч томоохон компани бөгөөд Сөүл-Улаанбаатарын чиглэлд нислэг үйлдэх бүх бэлтгэл хангагдсан талаар тус компанийн удирдлага мэдэгдээд байна. Үйлчлүүлэгчдийг хамгийн ихээр чирэгдүүлдэг Сөүл-Улаанбаатарын чиглэлд ийнхүү чөлөөт өрсөлдөөний салхи сэвэлзсэнээр тийзний үнэ бодитоор хямдрах боломж бүрдэж байгаа юм. Үүнээс гадна Монгол улсын аялал жуулчлалын салбарт мэдэгдэхүйц эерэг нөлөө үзүүлж, зорчигч урсгал нэмэгдэнэ гэдгийг албаны хүмүүс онцлов.
Өмнө нь энэ чиглэлд долоо хоногт зургаахан нислэг үйлддэг, монополь байдал олон жил ноёрхож байв. Уг нь мэргэжилтнүүдийн тооцоогоор долоо хоногт 18-22 хүртэлх тоогоор нислэг үйлдэх бодит шаардлага бий гэдэг. Солонгос, Монголын талаас нэг нэг компани монополь эрх эдэлж байсан өнгөрсөн 30 шахам жилд аялал жуулчлалын оргил ачааллын үед нислэгийн тийзээ хоёр сараар хүлээх нь ердийн үзэгдэл байлаа. Энэ чиглэлд чөлөөт өрсөлдөөн бий болсноор нислэгийн тийзний 20-40 хувиар хямдрах боломжтой гэдгийг албаны хүмүүс мэдэгдсэн.
