Улаанбаатар хотын замын хөдөлгөөнд чөлөөтэй оролцож буй зарим автобус, машинууд дотор агаарын бохирдол үүсгэж, утаа хаядаг цөөнгүй. Олон жилийн насжилт болон эд ангийн эвдрэлтэй, өнгө үзэмж илт муудсан эдгээр тээврийн хэрэгслүүд оношилгоонд яагаад тэнцдэг, замын хөдөлгөөнд чөлөөтэй оролцдог талаар нийслэлийн иргэд олонтаа асуудаг. Харамсалтай нь нийслэлийн иргэдийн эрүүл, аюулгүй орчинд амьдрах эрхийг ноцтой зөрчиж буй тээврийн хэрэгслүүд хар утаагаа хаян замын хөдөлгөөнд оролцсоор л байгаа.
Харин Баянгол дүүргийнхэн иргэдийн эрүүл орчинд амьдрах эрхийг хангах зорилгоор 2018 оны 8-р сарын 1-нээс эхлэн утаа хаядаг, зөрчилтэй машинуудыг дүүргийн нутаг дэвсгэрээр явуулахгүй, хөдөлгөөнийг хязгаарлаж эхэлжээ. Энэ талаар Баянгол дүүргийн Засаг дарга С.Одонтуяа өөрийн цахим хуудсандаа тодорхой бичжээ. Энэхүү санаачилгыг Замын цагдаагийн албанаас дэмжин утаа хаядаг машинуудын талаар иргэдийн гомдлыг хүлээн авч байгаа юм байна.
Замын цагдаагийн газар өнгөрсөн долоо хоногт хар утаа хаяж, агаарт бохирдол үүсгэж байгаа 180 гаруй автомашинд торгууль ногдуулжээ. Мэргэжлийн байгууллагуудын хийсэн судалгаанаас үзэхэд Улаанбаатар хотын агаарын бохирдлын 20 орчим хувийг автомашинаас ялгарч буй утаа эзэлдэг. Нийслэлийн есөн дүүргээс анхлан иргэдийнхээ эрүүл орчинд амьдрах эрхийг хамгаалан ажиллаж эхэлсэнд Баянгол дүүргийнхэн сэтгэл хангалуун байгаагаа илэрхийлж байна.
