Хуучраагүй хуучны дуунууд
“Boyzone” хамтлагийн No Matter What, Every Day I Love You, Love Me For A Reason, All That I Need, Picture of You гэх мэт олон сайхан дууг нь 1990-ээд оны залуус одоо ч сонсох дуртай. Энэ удаад “Boyzone”-ы ертөнцөөр аялая.
Нэгэн цаг үе охидын зүрхийг догдлуулж, шархлуулж, уярааж явсан Ирландын хөвгүүдийн хамтлаг “Boyzone”-ий 25 жилийн ой энэ онд тохионо. Тэгвэл тус хамтлаг 25 жилийн ойгоо тохиолдуулан сүүлчийн цомгоо гарган, үүний дараа албан ёсоор хамтлагаа тараана гэдгээ дуулгалаа. Хэдийгээр сүүлийн жилүүдэд нам гүм байсан ч тус хамтлагийнхан тарлаа гэх мэдээгээ үүнээс өмнө шүтэн бишрэгчдэдээ дуулгаагүй байсан юм. Шинэ цомгийн дараа хамтлагийн гишүүд тус тусын мөрөө хөөж, соло уран бүтээл дээрээ ажиллах юм байна.
2009 онд хамтлагийн гишүүн, гоцлол дуучин Stephen Gately төрөлхийн зүрхний өвчний улмаас 33-хан насандаа харамсалтайгаар нас барсан. 1999 онд гэй гэдгээ зарлаж, ижил хүйстэнтэйгээ гэрлэсэн тэрээр бэлгийн цөөнхийн дуу хоолой болж, эрхийг хамгаалахын төлөө тэмцэж ирсэн нэгэн. Тэгвэл хамгийн сонирхолтой нь тус хамтлагийн удахгүй гарах сүүлчийн цомогт түүний нас барахаасаа өмнө бичүүлсэн, олонд хүрээгүй хэд, хэдэн дуу багтах юм байна. “Boyzone”-ынхан тус цомгоо Gately-ын дурсгалд зориулж гаргах юм байна. Тэд одоогоор цомгийн ажилдаа ороод буй бөгөөд оны сүүлээр бэлэн болгохоо мэдэгдээд байна.
Ингээд 1999 он руу хамтдаа эргэн аялж тус хамтлагийн “No matter what” гэх сайхан дууг сонсоцгооё.
