УИХ-ын эрхэм гишүүн О.Баасанхүү ойрд нэлээд бухимдалтай байгаа бололтой. Ерөнхийлөгчийн сонгуульд өөрийнх нь намаас нэр дэвшсэн С.Ганбаатарыг анхнаас нь эсэргүүцэж, дэмжихгүй гэдгээ ил тод илэрхийлснээс хойш түүнд элдвийн зүйл тохиолдсоор байна.
Эрхэм гишүүн өчигдөр “Улс төрийн талбарт үнэхээр ганцаардаж байна. Ядаж байхад удирдагч гэж бодсон нөхөр улс төрийн хорыг жинхэнэ хийдэг нөхөр” хэмээн жиргэжээ. Түүний энэ жиргээнээс харахад улс төрд хор хутгадаг удирдагч нь МАХН-ын дарга Н.Энхбаяр болж таарах нь. МАХН-аас нэр дэвшигч С.Ганбаатар эхний санал хураалтаар хоёроор гарч ирсэн ч МАН-ын М.Энхболд шөнө дөлөөр түүний саналыг гэнэтхэн гүйцэж, аман хүзүүнд ороод ирсэн. Нэр дэвшигчийнхээ авсан саналыг хамгаалахын оронд МАХН-ын дарга Н.Энхбаяр МАН-ын дарга М.Энхболдтой нууцаар уулзсан гэх мэдээлэл гараад байгаа юм. Үүнд эрхэм гишүүн О.Баасанхүү бухимдсан байж болох талтай.
Ганц дайчин ганцаардахгүй гэдэг шиг сөрөг хүчний үүргийг тун сайн гүйцэтгэж байгаа О.Баасанхүү гишүүнийг АН-д элсэж магадгүй гэсэн яриа Төрийн ордноор тэнүүчилж явна.
