Монголын тусгай хүчний 43 алба хаагч “SWAT challenge 2026″-д өрсөлдөж байна

АНЭУ-ын Дубай хотноо дэлхийн өнцөг булан бүрээс хамгийн шилдэг тусгай хүчний залуус хуран цуглаж, уулыг тал болтол өрсөлдөж байна. “SWAT challenge 2026” тэмцээнд Монгол Улсаа төлөөлөн оролцож буй гурван багийн бүрэлдэхүүнд тусгай хүчний 43 алба хаагч багтажээ. Өмнө нь манай улсаас хэзээ ч ийм өргөн бүрэлдэхүүнтэйгээр оролцож байгаагүй юм. Эдгээр залуус өнөөдөр түүхийг бүтээж байна. Дэлхийн бусад тусгай хүчнийхний чанар чансааг дэнсэлж, эн тэнцүү өрсөлдөж, юугаар ч дутахгүй харин ч бүр илүүрхэж чадна гэдгээ мэдэрч, бас бага зэргийн туршлага дутсанаас алтан медалийг шүүрээд алдаж байгаа нь эхний хоёрхон өдрийн доторх дүр зураг. Уулын дугуйн тэмцээнд Төрийн тусгай хамгаалалтын газрын “SSPA” баг хүрэл медаль хүртсэн.  Тэмцээний гурав дахь өдөр эхэллээ.