Ерөнхий сайдын нэр дурдагдсан гомдол, мэдээлэлд хяналт шалгалт хийж байгаа талаар Авлигатай тэмцэх газраас өнгөрсөн долоо хоногт мэдэгдсэн. Шалгалтын явцын талаар АТГ-ын Хэвлэл мэдээлэл, олон нийттэй харилцах ажилтан, комиссар Б.Билэгтээс тодруулахад “2025 оны 05 дугаар сарын 13-ны өдөр Ерөнхий сайд Л.Оюун-Эрдэнэ, түүний хүү О.Тэмүүлэн болон бусад этгээдэд холбогдох гомдлыг нэр бүхий иргэдээс гаргасны дагуу шалгаж эхэлсэн. Тайлбар авах, холбогдох санхүүгийн баримтуудыг гаргуулан авах ажиллагаа үргэлжилж байна.
Авлигын эсрэг хуулийн 13.4-р зүйлд заасны дагуу Засгийн газрын тэргүүн болон гишүүний хувиар Ерөнхий сайд Л.Оюун-Эрдэнийн хөрөнгө орлогын мэдүүлэгт хяналт шалгалт хийж эхэлсэн. Өнгөрсөн долоо хоногт Ерөнхий сайдын хүүг дуудаж мэдүүлэг авсан. О.Тэмүүлэн хөрөнгө орлогоо мэдүүлэх үүрэгтэй албан тушаалтан биш ч Ерөнхий сайд Л.Оюун-Эрдэнийн хамаарал бүхий этгээд учраас хөрөнгө орлогыг нь шалгах шаардлага гарна. Шалгаж дуусах хуулийн хугацаа 30 хоног. Шаардлагатай гэвэл дахиад 30 хоног сунгана” гэв.
