“Ego ptoduction”-ий хоёр дахь уран бүтээл болох “Хүйдэс” уран сайхны кино маргааш нээлтээ хийнэ. Аймшгийн төрөл жанрын уг киноны зохиолыг таван жилийн өмнө бичсэн ба бодит явдлаас сэдэвлэн бүтээжээ. Шунал ихэдвэл, хүн материаллаг зүйлд хэт шунавал юу болдогийг уг кино харуулна гэж кино уран бүтээлчид хэлэв.
Холливудын эсвэл япон солонгос киноны цагаан хувцастай сүнс энэ кинонд гарахгүй. Аймшгийн жанрын киног нэг шинэ алхамаар урагшлуулсан кино бүтээхийг уран бүтээлчид хичээсэн бөгөөд нүүр хувиргалтдаа хүний нүүр, биеийн анатомид нэмэлтээр өөрчлөлт оруулах тусгай технологи ашиглажээ. Нүүр хувиргагч Г.Хос-Эрдэнийн хэлснээр “Хүйдэс” кинонд монгол маягийн, хэт фантазитай биш илүү бодит мэт санагдахуйц сүнс, тийрэн үзэгчдэд айдсыг мэдрүүлэх нь ээ.
Киноны найруулагчаар А.Баярсайхан ажилласан ба гол дүрийн жүжигчин Д.Хосбаяр бяцхан хүүгийн хамт энэ уран бүтээлд тогложээ.
