УИХ-ын ээлжит сонгууль энэ жил болохтой холбогдуулж улстөрчдийн чих зөөлөрч, “САЙН ХҮН”-ий багаа зүүсэн, улс төрийн хүчнүүд ард түмэнд хэрхэн таалагдаж оноо цуглуулах талаар тархиа гашилгасан, сонгуульдаа бэлдсэн дүр зургууд хаа сайгүй хөвөрч байна.
Үүнтэй зэрэгцэн хэнийг УИХ-д сонгож олох эсвэл болохгүй талаар ч элдэв яриа, санал шүүмжлэлүүд олон нийтийн сүлжээнд их гар байна. Тэгвэл хэсэг залуус нийлж “RED LIST” буюу ирэх сонгуульд хэрхэвч сонгож болохгүй, ял эдэлж байсан хүмүүсийг нэрлэж, сонгохгүй байхыг ард иргэдэд уриалж байна. Залуус “RED LIST” нэртэй фэйсбүүк хуудсыг нээн ажиллуулж буй бөгөөд үүндээ ял эдэлж байсан, гэмт хэрэгт холбогдсон гэмт хэрэгтнүүдийг сонгохгүй байя аа хэмээн хөдөлгөөн өрнүүлж байгаа ажээ. Парламент гэмт хэрэгтэн улстөрчдөөс ангид байж тэнд ёс зүй тогтоно. Гэмт хэрэгтнүүд бидний дээр байгаа цагт шударга ёсыг иргэд хаанаас хайх юм бэ. Иймийн тулд иргэдийн оролцоотойгоор ёс зүйтэй цэвэр парламентыг бий болгохоор бид бохир, гэмт хэрэгт холбогдсон улстөрчдийг зарлаж байна гэв.
