Монголын эрүүл мэндийн ажилтны үйлдвэрчний эвлэлийн холбооны дарга Ч.Нарантуяа цаг үеийн асуудлаар өнөөдөр мэдээлэл хийлээ. Тэрбээр “Эрүүл мэндийн салбар хүний нөөцийн хомсдолд орсон. Боловсон хүчний бодлогыг зайлшгүй анхаарах шаардлагатай. Тус салбарын ажилтнуудын хөдөлмөрийн үнэлэмж доогуур байна.
Монголын эмч нар олон улсын тусламж үйлчилгээг иргэдэд үзүүлж байгаа. Гэтэл олон улсынхаас 10 дахин бага цалин авч байна. Эрүүл мэндийн салбарын ажилтнууд гадаадад гарч ажиллах урсгал нэмэгдсэн. Энэ асуудалд Эрүүл мэндийн яам, Засгийн газраас бодитой анхаарах шаардлагатай.
Бид 2021 оноос хойш эрүүл мэндийн салбарын ажилтнуудын суурь цалинг хоёр дахин нэмэх хэрэгтэй талаар шаардлагатай тавьж байгаа. Гэвч ахиц дэвшил гарахгүй байна. Суурь цалингаа нэмээгүй эмнэлэг байна. Эмч гэхэд 965 мянган, сувилагч 800 орчим мянган төгрөгийн цалин авч байгаа тохиолдол бий. Ялангуяа орон нутгийн өрх, дүүргийн нэгдсэн эмнэлэгт цалин нэмэгдээгүй. Эрүүл мэндийн салбарын ажилчдын үндсэн цалинг нэмэхгүй бол ажил хаялт зарлана” гэв.
