Малайзын дээд шүүх 2006 онд бусдын гарт хэрцгийгээр амь насаа алдсан Монголын загвар өмсөгч Шаарийбуугийн Алтантуяагийн гэр бүлд 1.53 сая сингапур доллар буюу 1,1 сая ам.долларыг нөхөн төлөх шийд гаргажээ. Баасан гарагийн өглөө болсон шүүх хуралд иргэний шүүхийн шүүгч Вазир Алам Мидин Мира хохирогчийн ар гэрийнхэн Абдул Разак Багинда, цагдаа асан Сирул Азхар Умар, Азила Хадри нарын эсрэг нэхэмжлэлээ амжилттай нотолсон гэж Малайзын сайтад онцолсон байв. 2007 онд иргэний нэхэмжлэл гарснаас хойш ийнхүү 15 жилийн дараа шүүхийн шийдвэр гарсан нь энэ юм.
2019 онд эхэлсэн шүүх хуралд нэхэмжлэгч нарын 26 гэрч, тэр дундаа доктор Шаарийбуу, Алтантуяагийн том хүү Баярхүү нар мэдүүлэг өгсөн байна. Шүүх хуралд Абдул Разак мэдүүлэг өгөөгүй байна.
Алтантуяаг 2006 оны аравдугаар сард хөнөөж, цогцсыг нь цэргийн зориулалттай тэсрэх бодисоор дэлбэлсэн байдаг. Цагдаа байсан Азила, Сирул нарыг хүний амь хөнөөсөн хэрэгт буруутай болохыг шүүх тогтоож, 2009 онд цаазаар авах ял оноожээ. Хэргийн хамгийн гол эзэн, буруутан гэж болох тухайн үеийн Ерөнхий сайдын орлогч Нажиб Разакийн туслах асан Абдул Разакыг өмнө нь хоёр хүнийг гэмт хэрэг хийхэд хэрэг хийхэд өдөөсөнд тооцож буруутгаж байсан. Харамсалтай нь шүүхээс түүнийг цагаатгасан байна.
