Монгол Улсын Засгийн газрын 2021 оны нэгдүгээр сарын 4-ний өдрийн хуралдаанаар Цагаан сарын баярыг нийтээр тэмдэглэхгүй байхаар шийдвэрлэсэн.
Нийслэлийн Засаг даргын нэгдүгээр орлогч Ж.Сандагсүрэн “Цагаан сарыг тэмдэглэхгүй байх шийдвэр гарчихсан учраас нийслэл зохицуулалт хийж, хөл хорио, хязгаарлалт тогтоох шийдвэрүүд гаргана. Нөхцөл байдалтайгаа уялдуулаад шийдвэр гаргах бөгөөд иргэд болон бизнес эрхлэгчдэдээ аль болох урьдчилаад мэдээлэл өгөх, ижил түвшний мэдээлэлтэй байлгах боломжоор хангана” хэмээн мэдэгдэж байсан удаатай.
Үүнтэй холбоотойгоор хоёрдугаар сарын 5-наас эхлэн нийслэл хотод хатуу хөл хорио тогтоох тухай мэдээлэл гараад байна. Энэ талаар албаны эх сурвалжаас тодруулахад “Хөл хорио тогтоох тухай шийдвэр албан ёсоор гараагүй байна” гэлээ. Гэхдээ сар шинийн баяртай холбоотой Нийслэлийн Засаг даргын захирамж гарна гэдгийг эх сурвалжууд мэдэгдлээ.
