Сонгуулийн ерөнхий хорооноос өнөөдөр 12:00 цагт сонгуулийн ирцийн талаар мэдээлэл хийлээ. Тус хорооноос мэдээлснээр орон нутагт 16.4 хувь, нийслэлийн хэмжээнд 13.7 хувь, улсын хэмжээнд 15.2 хувьтай байна. Энэ нь өмнөх сонгуулийн ирцтэй харьцуулбал сонгогчдын оролцоо идэвхтэй байгааг онцлов.
Дээрх ирц нь өглөөний 07.00 цагаас өдрийн 11.45 цаг хүртэл авсан мэдээлэл гэдгийг тодотгож байлаа. Өнөөдөр өдрийн 12:00 цагийн байдлаар сонгуулийн санал хураалттай холбоотой ямар нэгэн албан ёсны гомдол гараагүй байгаа аж. Харин СЕХ-ноос иргэд сонгогчдодоо хандаж, төрийн сонгууль явж байгаа учраас энд ямар нэгэн нам эвслийн эрх ашиг гэж байхгүй.
Хар машин гэж хэлээд, яриад байх юм. Тиймээс төрөө хүндэтгээд хар машин биш, санал тоолох төхөөрөмж гэж хэлж заншмаар байна гэсэн юм. Өнөөдөр СЕХ-ноос эхний ирцийн мэдээллээ 12.00 цагт өгсөн дараагийнх нь 15.00 цаг, хамгийн сүүлийн мэдээлэл нь 19.00 цаг гэж товложээ.
