Сэлэнгэ аймагт тусгаарлагдаж байсан нэг хүний давтан шинжилгээний хариу эерэг гарснаар Монгол Улсад коронавирусний халдвартай хүний тоо дахин нэгээр нэмэгдэж 16 болсон. Халдвар авсан 16 дахь хүнээр бүртгэгдсэн иргэн нь ОХУ-д сурдаг, 20 настай оюутан юм байна.
Тэрээр гуравдугаар сарын 26-27-нд шилжих шөнө хойд хилээр орж ирээд Сэлэнгэ аймгийн төвд тусгаарлагдаж байсан юм байна. Давтан шинжилгээгээр халдвартай болох нь батлагдсан түүнийг Улаанбаатар хотод авчрахаар ажлын хэсэг Сэлэнгэ аймаг рүү зорьсон бөгөөд ХӨСҮТ-д авчирч эмчилгээ эхлэх ажээ.
