Тусгаарлах байранд байх хугацаа нь дууссан иргэдийг гэртээ өөрийгөө тусгаарлахыг мэргэжлийн байгууллагаас зөвлөж байгаа. Энэ дагуу иргэдийг тусгаарлах байрнаас гэртээ гарахад нь баталгааны хуудас дээр гарын үсэг зуруулж, заавар зөвлөгөөг сайтар өгч байгаа аж. Гэвч гэртээ гарсан иргэд гэрийн хориог зөрчих явдал цөөнгүй гарчээ. Тухайлбал Сэлэнгэ аймгийн иргэн сануулсаар байтал гэрийн хорионд байлгүй нийслэл Улаанбаатар хотод ирж хэд хоногоор архидан согтуурсан тохиолдол гарчээ. Ийм иргэдтэй хатуу хариуцлага тооцож, холбогдох хууль тогтоомжийг сахиулна гэдгээ Улсын онцгой комиссоос анхаарууллаа.
Хэн нэгний хэнэггүй үйлдэл манай улсад коронавирусний халдвар тархах нөхцөл байдлыг үүсгэж болзошгүй тул тусгаарлах байрнаас гэрийн хорионд шилжсэн иргэд төдийгүй бусад иргэд ч анхаарал болгоомжтой байхыг УОК сануулав.
