Дэлхийн тэрбумтнуудын нэг Билл Гэйтс “Майкрософт” болон “Бэркшэйр Хатавэй” компаниудын удирдлагын ажлаас хөндийрч, чөлөөнд гарч буйгаа баасан гарагт зарлалаа. Өдгөө 64 настай Билл Гэйтс хүмүүнлэгийн ажилдаа илүү цагийг зарцуулахын тулд ийнхүү дээрх ажлаа орхихоор шийдсэн байна.
“Майкрософт” корпорацаас гаргасан мэдэгдэлдээ манай компани цаашид ч Биллийн зөвлөгөө, технологийн санаа санаачилгуудыг бүтээгдэхүүн, үйл ажиллагаандаа тусгаж явах болно. Дэлхий дээрх хүн бүрийг, байгууллага бүрийг илүү амжилтад хүргэх гэсэн бидний зорилгод хамтран зүтгэж байсан Биллд туйлаас баярлаж байна гэжээ.
Билл Гэйтс нь дэлхийн хамгийн баян хүний жагсаалтад Амазон компанийн Жефф Безосын дараа буюу хоёрдугаарт жагсдаг бөгөөд нийт 100 тэрбум долларын хөрөнгөтэй ажээ. Тэрээр “Билл ба Мэлинда” сангаар дамжуулан 2008 оноос хойш
дэлхийн дулаарал, аж үйлдвэр, боловсролын салбарт хүмүүнлэгийн үйл хийж ирсэн юм.
