Английг зорьж байсан ачааны автомашинаас олдсон 39 цогцсуудын дийлэнх нь вьетнамын иргэдийнх байж магадгүй болоод байгаа. Учир нь хууль бусаад Англид хүргэнэ гэсэн зуучид итгэж мөнгөө өгч нутгаасаа гарсан 25 вьетнам иргэн сураггүй болсон бөгөөд ар гэрийнхэн нь Ирландад ачааны автомашинаас олдсон цогцсууд тэдний гэр бүлийнхнийх байж магадгүй гэж үзэж байгаа юм. Хамгийн сүүлд ээж, аавдаа хайртайгаа дамжуулж, амьсгалж чадахгүй үхэж байгаагаа хэлээд холбоо тасарсан 26 настай вьетнам охины аавын хэлснээр зуучлагч нар Англи хүрэх аялал аюулгүй, онгоц болон автомашинаар хүргэнэ гэж хэлжээ. Охины аав ээж хууль бусаар хил давах аялалд гарахыг дэмжээгүй ч охин нь гэр бүлээ өр зээлээс гаргахын тулд явна гэж эрс шийдсэн аж. Учир нь тэдний гэр бүл нэлээд хэмжээний өрөнд орсон байж. Ийм аюултай замаар, хөргүүртэй машинаар явахыг мэдсэн бол хэзээ ч зөвшөөрөхгүй байсан гэж аав нь BBC агентлагт ярьсан байна.
