Шахмал түлшний угаарын хийнээс болж 4 хүн нас барсан харамсалтай хэрэг гарсан. Тэгвэл Таван толгой түлш ХХК-ийн ахлах зөвлөх Г.Бадамхатан энэ нь түлшнээс болоогүй гэж мэдэгдлээ. Түүний хэлснээр шахмал түлшийг гурван лабораторид шинжлүүлэхэд хүний биед ямар нэгэн сөрөг нөлөө илрээгүй байна. Харин шахмал түлшийг түлэхдээ технологийн горим алдсанаас угаарын хийнд хордсон гэж үзэж байгаа аж. Мод, нүүрс, газ гэх мэт шатах материалууд дутуу шатсан нөхцөлд угаарын хий үүсдэг. Өөрөөр хэлбэл, аливаа зүйл шатахад 3-4 төрлийн хий гардаг бөгөөд хүчилтөрөгчийн оролцоотойгоор шатдаг байна. Харин хүчилтөрөгч дутагдсан үед дутуу шаталт явагдаж угаарын хий дээшээ яндангаар биш зуухны ам гэх мэт газраар гадагшилдаг байна.
Улаанбаатар хот жилдээ дунджаар 1.2 сая тонн нүүрс түлдэг бол сайжруулсан шахмал түлшийг 600-700 тонн байхад нийт 220 мянган гэр хорооллын өрхийг бүрэн хангах аж. Энэ нь нийслэлийнхний шатааж байсан нүүрсний хэмжээ хоёр дахин багасна гэсэн үг.
