Дорнод аймаг дахь Зэвсэгт хүчний 327 дугаар ангийн байлдагч Н 2019 оны есдүгээр сарын 18-ны өдөр Чойбалсан сумын “Өлзийт” гэдэг газар хадлан бэлтгэж байх явцдаа хөдөлмөрийн аюулгүй ажиллагаа зөрчигдсөнөөс болж чиргүүлтэй машин дээрээс унаж амь насаа алдсан харамсалтай хэрэг гарсан. Энэ хэрэг одоогийн байдлаар Дорнод аймгийн Цагдаагийн хэлтэс дээр шалгагдаж байна. Шүүх эмнэлгийн дүгнэлт болоод бусад эцсийн хариунууд гараагүй. Тухайн үед хадлан дээр ажиллаж байсан цэргүүдийг дэд ахлагч н.Баяртулга ахалж явсан бөгөөд өвс ачсан машин дээр сууж явахдаа замын донсолгооны үед унасан байх магадлалтай гэсэн урьдчилсан дүгнэлт байгаа ажээ.
Цэргийн алба хаахаар очсон залуусыг хадлан бэлтгэх ажилд оролцуулж болно гэсэн журам байдаг бөгөөд Ерөнхийлөгч баталдаг гэж ЗХЖШ-ын эх сурвалж хэлэв. Гэвч хөдөлмөрийн аюулгүй ажиллагаа алдагдсанаас болж байлдагч амиа алдсан байхад 327-р ангийн захирагчид сахилгын шийтгэл ногдуулаад өнгөрчээ. Холбогдох журмын дагуу оршуулгын зардал, 5 жилийн цалинтай тэнцэх хэмжээний мөнгөн тэтгэмж ар гэрийнхэнд нь өгсөн ч хүүгийнх нь амь насыг юу ч орлож чадахгүй. Батлан хамгаалах салбарт алба хаахаар очсон залуус энх цагт амь насаа алдсаар байхад дарга нар сахилгын шийтгэл хүрчихээд юу ч болоогүй мэт алхаж л явна
Батлан хамгаалахын сайд Н.Энхболд өмнө нь бас нэг байлдагч амь насаа алдахад сахилга хариуцлагыг чангатгана хэмээн мэдэгдэл хийсэн. Гэтэл хөдөлмөрийн аюулгүй байдлын наад захын шаардлага хангалгүй хүн тээвэрлэж явснаас дахиад нэг залуу амь насаараа хохирлоо. Галт тэрэг осолдоход салбарын сайд нь ажлаа өгөөд огцорсон жишиг энэ Засгийн газарт бий. Удирдаж байгаа салбарт нь байлдагчдын амь нас эрсэдсэн олон тохиолдол гарч байхад, хоёулаа нийлж байгаад эмэгтэй албан хаагчийг хүчиндсэн гэх ноцтой хэргүүд гарсан байхад Батлан хамгаалахын сайд Н.Энхболд, хилийн цэргийг хариуцдаг Хууль зүй дотоод хэргийн сайд Ц.НГямдорж нар хариуцлагаас бултаж, арьсаа хамгаалан чимээгүй суусаар л байх уу.
