Ашигт малтмал, газрын тосны газраас шатахууны үнийн хэлбэлзлийн талаар мэдээлэл хийлээ. Албаны эх сурвалжийн хэлж байгаагаас үзвэл энэ сард шатахууны үнэ зохих хэмжээнд буурах ч ирэх сард нэмэгдэх магадлалтай байгаа ажээ.
Ашигт малтмал, газрын тосны газрын орлогч дарга Ц.Эрдэнэбаяр “Он гарснаар гурав, дөрөв, тавдугаар сард дэлхийн зах зээл дээрх түүхий төс болон импортоор орж ирж байгаа түүхий тос тонн тутмын үнэ өссөн. Үүнээс шалтгаалан АИ92 шатахууны үнэ гурван удаа өсч 180-200 төгрөгөөр нэмэгдсэн. 2019 оны тавдугаар сарын сүүлээр шатахууны үнэ буурч орж ирсэн. Зургадугаар сарын эхээр дизель 40-50 төгрөг, АИ92 шатахуун 50 орчим төгрөгөөр буурсан байна.
Долоодугаар сарын эхнээс бензиний үнийг дахин буулгана хэмээн Уул уурхай, хүнд үйлдвэрийн сайд өмнө нь мэдэгдсэн. Үүний дагуу өчигдрөөс эхлэн жижиглэнгийн үнийг дахин буулгалаа. Тухайлбал, нийслэл дэх шатахуун түгээх станцуудад АИ92 бензиний үнэ литр тутамд 50 орчим төгрөгөөр буурсан. Орон нутагт ч адилхан хямдарна.
Он гарсаар бензиний үнэ литр тутамд 100-110 төгрөгөөр буурсан. Гэвч сүүлийн үед газрын тосны үнэ эргээд нэмэгдэх байдал ажиглагдаж байна. ОХУ-аас манай нийт бүтээгдэхүүнийхээ 95 орчим хувийг авч байна. Эхний хагас жилийн байдлаар 960 орчим мянган тонн газрын тосны бүтээгдэхүүн авчээ. Сингапурын бирж дээр сүүлийн хоёр долоо хоногт газрын тос баррель нь 13 орчим хувиар өсөж 64 ам.долларт хүрлээ. Энэ өсөлт наймдугаар сараас манай улсад тодорхой хэмжээнд ажиглагдана” гэв.
