ОУХБХ-ны зүгээс хөлбөмбөг хэмээх хэзээ ч уйдаахгүй гайхалтай спорт хүнийг хэрхэн өөрчилдөг, цаашлаад энэ спортыг сонгосноор амьдралаа ч өөрчлөх боломжтой гэдгийг харуулахаар дэлхийн зургаан орныг сонгон баримтат киног бүтээж байгаа.
Монголын Хөлбөмбөгийн Холбоо ОУХБХ-нд төслөө илгээсний үр дүнд “FIFA Forward” хөтөлбөр хэрэгжиж эхэлснээс хойш гурван ч сонгон шалгаруулалтад амжилттай оролцсон билээ. Үүний нэг нь Төв аймагт байрлах “Шигшээ багийн бэлтгэлийн бааз”-ыг барьж байгуулах төсөл байв. Энэхүү киногоор ОУХБХ-ны “FIFA Forward” төсөл улс орнуудад хэрхэн хэрэгжиж байгааг үзүүлэх аж. Тиймээс уг төслийг амжилттай хэрэгжүүлж буй Монгол Улс тус зургаан орны нэгээр нэрлэгджээ.
Монголын Хөлбөмбөгийн Холбоо ОУХБХ-нд санал болгосны дагуу манай улсаас Дархан-Уул аймгийн уугуул “Соёмбын Барсууд” багийн хагас хамгаалагч Э.Хосбаяр сонгогдсон бөгөөд ОУХБХ-той гэрээлэн ажилладаг сэтгүүлч, зураглаач нар гурав хоногийн турш түүний амьдралтай танилцаж, Дархан-Уул, Төв аймагт зочлон зураг авалтаа дуусгаад буцсан байна.15-20 минут үргэлжлэх тус баримтат кино зургадугаар сарын эхний долоо хоногт олны хүртээл болох гэнэ.
