НИТХ-ын долдугаар хуралдаанаар НИТХ-ын дарга С.Амарсайханыг төлөөлөгчдийн олонхи нь Нийслэлийн Засаг дарга бөгөөд Улаанбаатар дарга болгохоор дэмжиж үүнийг нь Ерөнхий сайд У.Хүрэлсүх батламжилсан. Ингэснээр НИТХ-ын даргын албан тушаалд дахин өөр нэгнийг томилох хэрэгтэй болж өнөөдөр орой НИТХ-ын Тэргүүлэгчид даргаа томилохоор хуралдлаа.
МАН-ын Удирдах зөвлөлийн шийдвэрийн дагуу НИТХ дахь МАН-ын бүлэг Р.Дагвыг хурлын дарга нэр дэвшүүлжсэн бол тус бүлгийн төлөөлөгч Ц.Байгалмаа заалнаас НИТХ-ын даргад өөрийнхөө нэрийг дэвшүүлсэн юм. Ийнхүү нэг намын бүлгээс хоёр нэр дэвшигч тодорсон учраас МАН-ын бүлэг хуралдахаар НИТХ-аас 30 минутын завсарлага авсны дараа Ц.Байгалмаа нэрээ татаж НИТХ-ын даргад ганц нэр дэвшигч үлдэв. Ингээд хуралдааны дэгийн дагуу санал хураалтыг нээлттэй явуулахад Р.Дагва 28 хүний саналаар буюу хуралдаанд оролцсон нийт төлөөлөгчдийн 66.67 хувийн саналаар НИТХ-ын дарга боллоо. АН-ын бүлэг санал хураалтад оролцоогүй бөгөөд завсарлагааны дараа хуралдааны танхимд орж ирээгүй юм.
