Америкийн ерөнхийлөгч Доналд Трамп, Хойд Солонгосын удирдагч Ким Жон Ун нарын хоёр дахь удаагийн дээд хэмжээний уулзалт энэ сарын 27, 28-нд Вьетнамын Ханой хотод болно.
Хойд солонгосын тэргүүн амралтын өдөр хуягласан галт тэргээр Ханой хотыг зорин нутгаасаа гарсан бөгөөд АНУ-ын ерөнхийлөгч Доналд Трамд хувийн онгоцоороо Вьетнамд газардах юм.
Вьетнамын Засгийн газар олон улсынхны анхаарлын төвд байгаа энэ уулзалтын бэлтгэлийг хангаж дууссанаа өнөөдөр мэдээллээ.
Тэд хоёр орны тэргүүн нарын хоёрдугаар уулзалт Ханой хотын төвд байх Засгийн газрын ордонд болно гэж зарим эх сурвалж мэдээлсэн бол зарим нь “Metropole” зочид буудалд болно гэж мэдээлээд байна. Цэргүүд Засгийн газрын ордон болон “Metropole” зочид буудлын орчимд хамгаалалтад гарч, металь илрүүлэгчээр ойр орчмыг нь самнан шалгасан талаар Ройтер агентлаг мэдээлэлдээ дурджээ.
Ямартай ч хойд солонгосын тэргүүн өнөөдөр Ханойд хөл тавих бөгөөд түүнийг Хятадын хил дээрээс тосч авч, машинаар Ханой хүргэхээр төлөвлөн замны хөдөлгөөнийг хааж, 100 гаруй цэрэг Донг Данг төмөр замын буудлын орчим хамгаалалтад гарсан байна.
Албаны хүний мэдээлснээр тус улс энэ уулзалтын бэлтгэлд 10 хоног зарцуулжээ. Уулзалтын үеэрх аюулгүй байдлыг бид дээд зэргээр хангасан гэж Вьетнамын Гадаад хэргийн орлогч сайд мэдэгдсэн байна.
Мөн тус уулзалтыг сурвалжлахаар дэлхийн 40 орны 3000 орчим сэтгүүлч Ханойд ирэхээр хүсэлтээ гаргасан байна.
