Калифорни мужид гарсан түймэр өнөөдрийн байдлаар 50 хүний аминд хүрчээ. Тус мужид жил бүр шахам их, бага хэмжээгээр түймэр гардаг боловч энэ удаагийн түймэр хамгийн их хор хохиролтой, олон хүний амийг авч одсон нь болж байна. Хуурайшилт болон салхи ихтэй байгаагийн улмаас түймэр улам газар авч байгаа бөгөөд шөнийн цагаар, хүйтэн болоход галын эрч улам нэмэгдэж, урьдчилан таамаглаагүй газруудыг шатаах болжээ. Түймэрт автсан газрын хэмжээ нь Денвер мужийн газар нутгаас давсан гэж CNN мэдээлж байна. одоогоор 300 мянган орчим хүнийг нүүлгэн гэр орноос нь нүүлгэн шилжүүлжээ. Түймрийн шалтгааныг одоогоор тогтоогоогүй байгаа бөгөөд цахилгааны утаснаас үүдсэн байх гэсэн урьдчилан таамаглалтай байна.
Мөнхийн гал түймрийн асуудалтай байдаг гэж болох уг мужийн гал сөнөөгчид өнгөрсөн 30 хоногт гэхэд 500 удаагийн гал түймрийн дуудлагатай ажиллажээ. Калифорни мужийн захиргааны зүгээс ой хээрийн түймрээс сэргийлэх ажилд өнгөрсөн жил 256 сая ам.долларыг зарцуулсан байна.
