Ерөнхий сайд, МАН-ын дарга У.Хүрэлсүх удирдах зөвлөлийнхөө хурал нэр бүхий албан тушаалтнуудыг албан тушаалаасаа огцорч, хуулийн байгууллагад шалгуулахыг шаарджээ. Тэрбээр “УИХ-ын дарга М.Энхболд та ажлаа өг. Хариуцлага тооцож огцруулах шийдвэрийг намын дүрмийн дагуу хэлэлцүүлнэ. Монгол төрийн албан тушаалыг үнэлсэн гэх 60 тэрбумын хэрэгт холбогдсон. Ажлаа өгөөд хуулийн өмнө та монгол хүний ёсоор оч.
УИХ дахь МАН-ын бүлгийн дарга Д.Хаянхярваа та ажлаа өг. УИХ дахь МАН-ын гишүүдтэй холбоотой хариуцлагын асуудал Тантай ч мөн адил холбоотой. ЖДҮХС-тай холбоотой хариуцлагын асуудлыг УИХ-ын чуулган дээр хэлэлцүүлэхэд Та зарчмын эсрэг байр суурийг удаа дараа мэдэгдэж ёс зүйн алдаа гаргасан. МАН-ын бүлгийн гишүүдийн эв нэгдэл, хариуцлагатай байдал, зохион байгуулалтыг ханган ажиллаж чадаагүй.
Нийслэлийн Засаг дарга бөгөөд Улаанбаатар захирагч С.Батболд та ажлаа өг. Хүн амын 50 хувь нь амьдардаг нийслэлийнхэн сүүлийн хоёр жилд амь нас, эрүүл мэндээрээ хохирч байна. Гэрийнхээ гадаа тоглож наадаж байсан гэм зэмгүй хүүхдүүд амиа алдаж, эрүүл мэндээрээ хохирлоо. Хотын утааг бууруулах талаар Та хоёр жил дорвитой алхам хийсэнгүй” гэжээ. Хэрэв энэ шаардлагыг биелүүлэхгүй бол ард түмнээсээ дэмжлэг авна хэмээн хэлжээ. МАН-ын удирдах зөвлөлийн хурал үргэлжилж байна.
