БОАЖЯ-наас Монгол Улсын аялал жуулчлалын чиглэлийг Засгийн газраар өнгөрсөн 7 хоногт батлуулсан. Гол чиглэлийн дагуу Хэнтий аймагт түүхэн аялал жуулчлал хөгжүүлэхээр болж, “Хүлэг боорчи-андлалын өргөө” түүхэн аялал жуулчлалын цогцолборын шав тавих ёслол боллоо.
Уг ёслолд УИХ-ын гишүүн, БОАЖ-ын сайд Намсрайн Цэрэнбат, УИХ-ын гишүүн Л.Оюун-Эрдэнэ нар орон нутгийн удирдлагууд болон Хэнтий аймгийн Батноров сумын иргэд оролцсон юм.
Уг цогцолборыг барихад нийт 2 тэрбум төгрөгийн санхүүжилт шаардлагатай бөгөөд энэ жил улсын төсөвт 1.4 тэрбум төгрөг суулгасан бөгөөд ирэх жил 600 сая төгрөг тусгуулахаар ажиллаж байгаа юм байна. 
“Хүлэг боорчи-андлалын өргөө” цогцолборын загварыг Монгол Улсын урлагийн гавьяат зүтгэлтэн, зураач, загвар зохион бүтээгч Д.Эрдэмбилэг гаргасан байна.
Энэхүү цогцолбор нь 18 метр өндөртэй, Чингис хаан, Боорчи нарын дүрслэл бүхий хөшөө хэлбэртэй байх бөгөөд газар газрын сайн эрс андын тангараг өргөж байх утга учир бүхий байгууламж байхаар төлөвлөжээ. Учир нь энэ газар нутагт Тэмүүжин 8 шаргаа хайж яваад Боорчитой таарч, андын тангараг өргөж байсан түүхтэй юм байна.
“Хүлэг Боорчи-андлалын өргөө” аялал жуулчлалын цогцолборын шав тавилаа
