Хамгийн сүүлийн мэдээллээр “Covid19”-ийн халдварын улмаас дэлхийн хэмжээнд 2700 гаруй хүн нас барж, 80 мянга орчим хүн халдвар аваад байна. Грек улсад уг вирусын анхны өвчлөл бүртгэгдэж, Францад корона вирусын халдвар авсан анхны хүн нас баржээ. Иран улсад 139 тохиолдол бүртгэгдэж, 19 хүн нас барсан ч халдвартай нь илрээгүй мянга орчим хүн байгаа гэж таамаглаж байгаа юм байна. Иранд байдал ингэж хүндэрсэнтэй холбоотойгоор тус улстай хиллэдэг Армени улс Ирантай хиллэдэг хилээ хаажээ.
Монголчуудын хамгийн их ажиллаж амьдардаг Солонгос улсад 1261 тохиолдол бүртгэгдсэн ба шинээр Бусан болон Дэгү хотод халдвар илэрчээ.
ДЭМБ-ын мэргэжилтнүүд болон АНУ-ын шинжээчид коронавирус нь цар тахлын хэмжээнд хүрсэн гэж хэлэхэд эрт байгаа ч ийм байдалд бэлдэх цаг нь болсон гэж анхааруулаад байгаа юм.
