УИХ-ын Хууль зүйн байнгын хорооны хуралдаанаар Н.Номтойбаяр гишүүний бүрэн эрхийг түдгэлзүүлэх тухай Улсын ерөнхий прокурорын саналыг хаалттай горимоор хэлэлцэв. Халдашгүй байдлын дэд хороо Н.Номтойбаярын бүрэн эрхийг түдгэлзүүлэх шийдвэр гаргасан бол Хууль зүйн байнгын хорооны гишүүдийн олонх нь гишүүнээ хамгаалах талд шийдвэр гаргажээ. Өөрөөр хэлбэл, Н.Номтойбаярын бүрэн эрхийг түдгэлзүүлэх шаардлагагүй гэж үзжээ. Байнгын хорооны хуралдаанд 13 гишүүн оролцсоноос 7 гишүүн Н.Номтойбаярын талд гар өргөж, зургаан гишүүн цөөнх болов.
Улсын Ерөнхий прокурор Б.Жаргалсайхан сэтгүүлчдэд ийм тайлбар өглөө. Тэрбээр “УИХ-ын гишүүн Н.Номтойбаяр арванхоёрдугаар сарын 12-ны өдөр хэвлэлийн хурлаар тодорхой мэдээллүүдийг задалсан. Мөрдөн байцаалт явагдаж байгаа учраас дахин мэдээлэл задрахгүй байх үүднээс бүрэн эрхийг нь түдгэлзүүлэх саналыг оруулсан. УИХ-ын гишүүн Н.Номтойбаярыг гэм буруутай гэж хэн ч хэлээгүй. Гэм буруутайг шүүх тогтоодог. Ганц яллах талын нотлох баримт цуглаж байна гэж үзэж болохгүй. Тухайн хүн өөрөө цагаадах нотлох баримтаа гаргаж өгөх үүрэгтэй” гэв.
