УИХ-ын гишүүний халдашгүй байдлын дэд хороо өнөөдөр мөн л ирцгүй гэдэг шалтгаанаар хуралдаж чадсангүй. Австрали улсад албан томилолттой ажиллаж байсан Д.Лүндээжанцан гишүүн ням гарагт эх орондоо ирсэн ч Ч.Улаан сайд Германд яваа ажээ. Тиймээс Хүнс, хөдөө аж ахуй, хөнгөн үйлдвэрийн сайд Ч.Улааныг иртэл Халдашгүй байдлын дэд хороо хуралдаанаа хийж чадахгүй боллоо.
Энэ хооронд гишүүн Н.Номтойбаяр Халдашгүй байдлын дэд хорооны хуралдаанд Нийгмийн хамгаалал хөдөлмөрийн болон Сангийн сайд нарыг байлцуулах хүсэлт гаргаад амжсан. Түүний энэ саналыг хүлээж авах боломжгүй гэдгийг Ц.Нямдорж гишүүн мэдэгдлээ. УИХ-ын гишүүний бүрэн эрхийг түдгэлзүүлэх санал парламентад ирснээс хойш 48 цагийн дотор шийдвэрлэнэ гэсэн хуулийн заалт ийн зөрчигдөв.
Улсын ерөнхий прокуророос Н.Номтойбаяр гишүүний бүрэн эрхийг түдгэлзүүлэн шалгах 3 үндэслэл байгааг албан бичигтээ дурджээ. Н.Номтойбаяр Нийгмийн хамгаалал, хөдөлмөрийн сайдаар ажиллаж байхдаа Хөдөлмөр эрхлэлтийг дэмжих сангийн хөрөнгийг зориулалтын бусаар зарцуулсан, УИХ-ын дэд дарга агсан Г.Батхүүгийн хэрэгт худал мэдүүлэг өгсөн зэрэг хэрэгт холбогдуулан шалгах шаардлага байгаа гэж үзжээ.
