Нийтээр тэмдэглэх баярын болон тэмдэглэлт өдрүүдийн тухай хуульд заасны дагуу энэ сарын 26, 27-нд буюу ирэх долоо хоногийн мягмар, лхагва гарагт бүх нийтээр амарна. Энэ сарын 26-нд Улс тунхагласны баяр, 27-нд Монгол бахархлын өдөр буюу Чингис хааны мэндэлсэн өдөр тохиож байна.
Монгол бахархлын өдрийг Монгол Улсад 2012 оноос бүх нийтийн амралтын өдөр болгон тэмдэглэн өнгөрүүлж байгаа. Тодруулбал, Монгол Улсын Ерөнхийлөгчийн 2012 оны 1 сарын 9-ний өдрийн 4 тоот зарлигаар эзэн богд Чингис хааны мэндэлсэн огноог холбогдох ажлын хэсгийн дүгнэлт болон ШУА-ны саналд үндэслэн албан ёсны болгож, билгийн тооллын өвлийн тэргүүн сарын шинийн нэгэн гэж тогтоон, уг өдрийг “Монгол бахархлын өдөр” болгон тэмдэглэн өнгөрүүлж байхаар болсон юм.
