Хүүхдийн порно бичлэгийн том сайтыг илрүүлж, эзэн болон үйлчлүүлэгч хүмүүсийг дайчлан баривчилсан талаар АНУ-ын Хууль сахиулах байгууллагын ажилтнууд мэдэгдлээ. Өмнөд Солонгост төвтэй үйл ажиллагаа эрхэлдэг тус сайтыг эрхэлж явуулж байсан Солонгосын иргэн 23 настай Жонг Вү Сонг баривчилсан байна. Түүнээс гадна уг сайтад хамааралтай АНУ, Англи, Герман, Саудын Араб, Чех, Канад, Ирланд, Испани, Австралийн 337 хүнийг илрүүлэн хэрэгт холбогдуулан шалгаж эхэлжээ.
Уг сайт нь 2015 оны 06 дугаар сараас хойш гурван жил гаруй ажилласан бөгөөд энэ хугацаанд биткойн болон крипто валютаар үзэгчдэд 250 мянган порно бичлэг бүхий видео санд нэвтрэх эрх үүсгэж өгчээ. Видео дунд хэтэрхий балчир хүүхдүүдийг хүчирхийлж буй маш гаж бичлэгүүд их байсан бөгөөд тус бичлэгүүдийг нэг саяас давсан тоогоор үзсэн, хадгалж авсан байв.
“Насанд хүрэгчдийн порно бичлэг нийтлэхийг хориглоно” гэсэн дүрэмтэй уг сайтад хүссэн хүн нь төлбөргүйгээр эрх нээн орж болдог, бичлэг татаж үзэх бол биткойн төлдөг байжээ. Хэрэв шинэ хэрэглэгч урьж оруулбал, мөн өөрөө бичлэг тус сайтад оруулбал оноо өгөх зарчмаар ажилладаг байв. Мөн хэрэглэгчид гүйлгээ хийхдээ нэрээ нууцлах боломжтойгоос гадна сайтын сангийн бараг тал хувь нь өмнө нь байгаагүй материалаас бүрдсэн байсан нь хуль хяналтынхныг балмагдуулсан байна.
Өнгөрсөн хугацаанд уг сайт 370 мянган ам.доллартай тэнцэхүйц биткойн цуглуулсан гэсэн тооцоо гарчээ. Өнөөг хүртэлх түүхэнд хүүхдийг садар самуунд ашигласан хамгийн том порно бичлэгийн сайт гэж онцолсон уг сайтын бичлэгт орж хүчирхийлэлд өртсөн насанд хүрээгүй 23 хүүхдийг Америк, Британи, Испаниас олж аварсан байна. Жонг Вү Сонг одоогоор өмнөд Солонгост 18 сарын ял эдэлж буй бол бусад гэмт этгээдүүдийг 15 хүртэл жилийн хугацаагаар яллаад буй юм байна.
